SUPLEMEN PA MAMRE 18-24 JUNI 2023, MATIUS 25:31-46

Teks : Matius 25: 31-46

Tema : Mamre Nggit Nampati

 

I. KATA PERLEBE

Ibas sienda kerina nggo kucidahken siman usihenndu. Kita arus mejingkat erdahin     guna nampati kalak musil. Ingetlah kai siikataken Tuhan Yesus, nina: Malemen kap ate ibas mere asangken ngalo (Perb Rasul 20:35). Ajaren siitulisken bas ayat enda mungkin berbanding terbalik ras pemahamen manusia umumna. Nampati ipahami lit si urak bahkan bene ibas dirita, sedangken kecenderungen manusia secara umum merhat guna ndatken. Tentuna jadi sada perjuangen man banta guna teken nandangi kai siikataken Kata Tuhan asangken perukuren manusia secara umum. Tuhu adi anajar-anjar sipegejabken maka lit kemalemen ate tupung kita nampati kalak sideban. Arah kita nampati malem ateta sebab sieteh geluhta erguna man kalak sideban.

II. TAFSIRAN/ISI

Teks oratenta merupaken bagin terakhir pengajaren Yesus kerna kedungen zaman. Pengajaren enda tentu labo ermaksud guna mpebiar-biar, gelah erkiteken mbiar emaka tek man Tuhan. Sebab, Dibata ibas Yesus Kristus emekap Dibata sidem keleng ate. Emaka lebih mehuli adi teks oratenta enda sitatap sebagai bentuk keleng ate Tuhan Yesus singgit mpebetehken kai denggo siterjadi ibas wari pendungi. IpebetehkenNa enda erkiteken kita anak-anakNa siikelengiNa.

Ibas wari pendungi, manusia ipeserap jadi dua bagin, eme kalaksi nggo ipasu-pasu Bapa guna ngaloken kinirajan sienggo isikapken Bapa man kalak singgo ipilihNa mulai kin ijadikenNa doni enda (ayat 34). Arah nghubungken ayat 34 enda ras ayat 35-36 siidah maka perbahanen mere man kalak melihe, mere minem kalak muas, mere kesilang man kalak tandang, mere uis man kalak simanjang-anjang, ndahi kalak sibas penjara labo alu tujun gelah ngaloken upah keselamaten. Keina perbahanen e ilakoken sebagai pengataken bujur erkiteken nggo ipilih guna iselamatken mulai kin lit doni enda. Emaka ibas ayat 37, kalak siarah kemuhen e labo ietehna ndigan nai e ilakokenna janah labo itehna e ilakokenna serir as ilakokenna guna Dibata. Ayat 37 enda ncidahken maka kalak siarah kemuhen e ngelakoken sie kerina alu merdeka, labo alu keterpaksaan erkiteken ngarapken upah.

Sedangken siarah kawes e lebih menunjuk man kalak si nulak pendilo Tuhan. Erkiteken penulakenna eme maka ia ndatken ukumen. Adi Dibata tentu lalit manusia siitulakNa, peraten Dibata la lit manusia kena ukumen (Bdk Joh 3:16). Perbahanen-perbahanen kalak si nulak pendilo Tuhan eme la mediate ras la nggit nampati kalak sideban. Sebab perbahenen sibage erbanding terbalik ras perbahanen siiteladanken Tuhan singgo ibuktikenNa nggit berkorban she mate guna manusia.

III. PENGKENAINA

Alu bage arah teksta enda banci sitarik piga-piga kesimpulen:

1. Perbahanen mediate teridah arah peka nandangi kalak sideban. Perbahanen sibagenda ncidahken perbahanen simeneladani perbahanen Dibata singgo tangkas kal ibas Yesus Kristus.
2. Sebalikna, perbahanen la mediate enda erlawanen ras perbahanen Dibata.

Ipeserap ibas wari pendungi, e nuduhken keadilen Dibata. Sebab tentuna labo seri saja kedungen kalak si mediate ras kalak sila mediate.

Tema, Mamre nggit Nampati sipahami alu payo rikutken teksta. Mamre nggit nampati ibas rangka ncidahken perbahanen kalak si nggo ipilih Dibata. Alu bage merdeka perasannta ibas nampati.

                                                                                    Pdt Pribadi S Meliala- GBKP Rg Tambun